Dagur kvenfélagskonunnar

  1. febrúar er Dagur kvenfélagskonunnar

Aðdragandinn að því að 1. febrúar var útnefndur Dagur kvenfélagskonunnar var að við undirbúning að 80 ára afmæli KÍ árið 2010 þótti stjórninni við hæfi að kvenfélagskonur ættu sinn eigin dag. Kannað var hvernig hægt væri að gera einhvern dag að degi kvenfélagsonunnar og eftir að hafa leitað álits ýmissa aðila og stofnanna var það ljóst að Kvenfélagasambandið þyrfti einhliða að lýsa daginn sem valinn yrði Dag kvenfélagskonunnar. Við hæfi þótti að dagurinn sem kvenfélagskonur ákváðu að flykkja sér saman um stofnun landssambands sins yrði fyrir valinu, en 1. febrúar er stofndagur Kvenfélagasambands Íslands. 

Í fréttatilkynningu um stofnun dagsins kom eftirfarandi fram:

Kvenfélagasambandið var stofnað árið 1930 sem sameiningar og samstarfsvettvangur kvenfélaganna í landinu sem þá þegar voru orðin fjölmörg. Fyrsta kvenfélagið, Kvenfélag Rípurhrepps, var stofnað árið 1869. 
Konur hafa síðan þá stofnað hundruð kvenfélaga með það að markmiði að bæta samfélagið, sérstaklega hvað varðar málefni barna, kvenna og fjölskyldna.
Má segja að konur hafi með því tekið völdin í sínar hendur löngu áður en þær fengu aðgengi að stjórnkerfinu með kjörgengi og kosningarétti. 
Störf kvenfélagskvenna eru og hafa verið  samfélaginu öllu afar mikilvæg þó ekki hafi þau alltaf farið hátt eða mikið farið fyrir þeim í fjölmiðlum.
Það er því löngu tímabært að sérstakur dagur sé helgaður kvenfélagskonum og hefur formannaráð Kvenfélagasambands Íslands einhliða lýst 1. febrúar, ár hvert, „Dag kvenfélagskonunnar.”

Kvenfélagasambandið hvetur allar kvenfélagskonur til að halda daginn hátíðlegan og landsmenn alla til að heiðra kvenfélagskonur þennan dag.

Eftir að KÍ hafði lýst 1. febrúar dag kvenfélagskonunnar hófst vinna við að festa hann í sessi.
Meðal þess sem gert hefur verið til þess er að haft var samband við þá aðila sem gera dagatöl og dagbækur og þess farið á leit að þeir geti dagsins í  sínum dagbókum og dagatölum.
Kvenfélög, kvenfélagskonur og landsmenn eru hvött til að muna eftir deginum og fjölmiðlar eru hvattir til að minnast hans á einhvern hátt.
Kveðjur hafa t.a.m. verið lesnar í RÚV ár hvert frá stofnun dagsins þar sem sveitarfélög senda kveðjur til kvenfélagskvenna með þakklæti fyrir framlag þeirra til samfélagsins og Kvenfélagasambandið sendir kveðjur til kvenfélagskvenna og hvetur konur til að leggja kvenfélaögunum lið.
Eins er spurt hvort dagur kvenfélagskonunnar sé ekki merktur í dægbækur viðkomandi.

Á Formannaráðsfundi 2016 kom upp hugmynd að Gylltum febrúar, í tilefni að degi kvenfélagskonunnar 1. febrúar og var "gyllta" nefndin stofnað til að koma með hugmyndir að því hvernig nýta mætti febrúarmánuð til að vekja athygli á störfum kvenfélaganna.

Kvenfélagasamband Íslands

Hallveigarstöðum  - Túngötu 14  - 101 Reykjavík
552 7430 
kvenfelag@kvenfelag.is

© 2017 Kvenfélagasamband Íslands