Út er komið 3ja tbl. tímaritsins Húsfreyjunnar, Kvenfélagasamband Íslands gefur út.
Meðal efnis í blaðinu er heimsókn til Signýar Ormarsdóttur hönnuðar og menningarfulltrúa Austurlands, í viðtali við hana kemur berlega í ljós að menning og listir eru virkt hreyfiafl í samfélaginu á Austurlandi þó fréttir af virkjunum og álveri láti hærra í fjölmiðlum.  Í viðtali við Kristbjörgu Þórhallsdóttur leiðsögumann kemur fram að víðáttán, skógleysið og fólksfæðin er meðal þess sem heillar erlenda gesti á ferð um Ísland. Handverkssýningin á Hrafnagili í Eyjafjarðarsveit er sótt heim og skýrt er frá Landsþingi Kvenfélagasambands Íslands á Akureyri í sumar. Sigþrúður Stella Jóhannsdóttir sendir inn póstkort úr Þjóðgarðinum við Jökulsárgljúfur og Birna á Borgum dagbókarbrot út Borgarfirði. Sigurlaug Margrét Jónasardóttir sér um matarþáttinn með margskonar girnilegum uppskriftum, s.s. franska nautakjötsúpu, ítölsk brauð og kjötbollur úr afgangskjöti. Hjördís Edda Broddadóttir gefur góð ráð frá Leiðbeiningarstöð heimilanna. Helga Jóna Þórunnardóttir sér um handavinnuþáttinn þar sem er að finna m.a. nýjar og spennandi prjónauppskriftir, útsaumsverkefni til að prýða heimilið og nútímalegar hugmyndir og uppskriftir af endurnýtingu á fatnaði.

Húsfreyjan fæst víða í bókaverslunum og í áskrift hjá K.Í. á Hallveigarstöðum s: 551 7044 email: This email address is being protected from spambots. You need JavaScript enabled to view it.
Íslenskar konur hafa gefið Húsfreyjuna út samfellt í 57 ár, ritstjóri er Kristín Linda Jónsdóttir í Miðhvammi í Þingeyjarsýslu.