Mánudaginn 13. júní sl. flaug íslenski hópurinn til
Helsinki. Þar var um að ræða Vikingline ferju sem lagði af stað frá
Stokkhólmi um kl. 17. og var gist í ferjunni og snætt þar af
kvöldverðarhlaðborði að kvöldi hins 13. en morgunverðarhlaðborði
þriðjudaginn 14. júní.
Komið var til Helsinki um kl. 9 um morguninn og var þá strax haldið í útsýnisferð um Helsinki en farið í heimsókn til Mörtu-sambandsins eftir
hádegi og dagurinn frjáls að öðru leyti. Gist var í stóru og glæsilegu
hóteli í miðborginni er nefnist Hotel Presidentti og var auðvelt að
fara ferða sinna um miðborgina út frá hótelinu, enda notuðu
þátttakendur sér það óspart. Sumir fóru í verslanir, aðrir á söfn og
sumir gerðu hvort tveggja.
Miðvikudagurinn 15. júní var til frjálsrar
ráðstöfunar en í eftirmiðdaginn bauð sendiherra Íslands í Finnlandi Jón
Baldvin Hannibalsson og frú, þátttakendum til móttöku á heimili sínu
sem var vel þegið.
Að loknum morgunverði fimmtudaginn 16. júní var síðan lagt af stað
til St. Michels með rútu. Tók ferðalagið um það bil fjórar
klukkustundir og var komið til Paukkula lýðháskólans í St. Michels, þar
sem sumarfundurinn var haldinn, um hádegisbil. Að loknum léttum
hádegisverði hófst skráning á sumarfundinn. sem síðan var settur og
þjóðsöngvar þátttökulandanna sungnir, en að því búnu ekið í kynnisferð
um St. Michels. Kl. 18.00 bauð svo landshöfðinginn, Pirjo Ala-Kapees,
til létts kvöldverðarhlaðborðs í embættisbústað sínum og bauð
þátttakendur velkomna, auk þess sem stutt ávörp voru flutt.
Að loknum morgunverði föstudaginn 17. júní hófust umræður um þema fundarins
- Finn njutning í närheten. Nýtið og njótið náttúrunnar í nágrenni ykkar.
Skiptust erindin í tvennt:
- Konur sem athafnamenn og framleiðendur umhverfisvænna afurða.
- Ráðgjöf Kvenfélagasambands Finnlands Marttaliitto um lífrænar afurðir í tímans rás.
Að
loknum hádegisverði fluttist fundurinn til Kenkävero en dagskráin þar
skiptist í upplýsingagjöf annars vegar og vinnustaðakynningu hins
vegar. Skoðað var brauðkolluverkstæði, farið í skoðunarferð um svæðið
með virkri þátttöku gesta, Mörtu starfsemin í Etelä-Savo könnuð
rækilega og Mörtu-menningarsetrið í Syreeni heimsótt.
Um
kvöldið var efnt til heimboða á finnsk heimili og höfðu gestir með sér
smágjafir í þakkarskyni til gestgjafanna. Meðal íslensku þátttakendanna
var almenn ánægja með hversu vel tókst til og voru Íslendingarnir mjög
þakklátir og ánægðir með þær höfðinglegu móttökur sem þeir áttu að
fagna.
Að loknum morgunverði 18. júní var farið í fróðlega
og ánæjulega ferð í Nyslott á milli kl. 9-17 og fólst hún í
skoðunarferð með leiðsögumanni um Olofsborg, fornan og forvitnilegan
miðaldakastala sem er á Heimsminjaskrá SÞ, og ferjusiglingu um
vatnasvæði héraðsins. Loks var skoðað merkilegt listasafn, sem að hálfu
var byggt neðanjarðar, Retretti-safnið, en það bauð m.a. upp á
yfirlitssýningu á verkum hins kunna finnska listmálara, Pekka Halonen
(1865-1933).
Um kvöldið var haldinn veglegur hátíðarkvöldverður í
Kenkävero sem Martasambandið bauð til. Klæddust þátttakendur
þjóðbúningum og öðrum hátíðarbúningum og fluttu heimatilbúin
skemmtiatriði undir borðum, en formenn og/eða fulltrúar
þátttökulandanna fluttu ávörp og afhentu gjafir til gestgjafanna.
Sumarfundinum var síðan slitið fyrir hádegi 19.
júní, lagt af stað til Helsinki með rútu og haldið um borð í Vikingline
áleiðis til Stokkhólms. Neyttu ferðalangar kvöldverðar í ferjunni og
mun það úrval af mat og drykk sem á borðum var lengi í minnum haft
meðal þátttakenda. Voru þar margir réttir í boði sem Íslendingar höfðu
aldrei áður augum litið hvað þá heldur bragðað.
Að morgni mánudagsins 20. júní neyttu þátttakendur
aftur glæsilegs morgunverðar í ferjunni áður en komið var til
Stokkhólms en þar beið rúta á hafnarbakkanum er flutti hluta af hópnum
út á Arlanda flugvöll, uns flogið var til Íslands með flugvél Flugleiða
til Íslands um hádegisbil.
Annar hluti hópsins varð eftir í
Stokkhólmi og hafði þar tveggja daga viðdvöl sem nýtt var til skoðunar-
og verslunarferða um borgina uns haldið var heim á leið eftir hádegi
miðvikudaginn 22. júní.
GA/KG/EÞ
Ljósmyndari EÞ