Helgina 11-12. maí verður boðið upp á fjölbreytta og fræðandi dagskrá fyrir alla fjölskylduna í Norræna húsinu. Áherslan verður lögð á viðgerðamenningu og aðferðir til að lengja líftímann á eigulegum og þörfum hlutum sem finnast á hverju heimili – allt frá reiðhjólum til buxna og brauðrista!

Markmiðið er að vekja athygli á 12. sjálfbærnimarkmiði Sameinuðu þjóðanna, sem hvetur til ábyrgari framleiðslu og neyslu.

Yfir helgina veður meðal annars boðið upp á smiðjur, fyrirlestra, námskeið, kynningar, markað, hönnunarsýningu og heimildarmyndir. Viðburðirnir eiga sameiginlegt að kynna leiðir til að nýta betur verðmætin allt í kringum okkur og draga úr sóun á ýmsum sviðum.

Saumaverkstæði kvenfélagskvenna: Vantar þig aðgang að saumavél? Kvenfélagasamband Íslands setur upp saumaverkstæði og aðstoðar gesti og gangandi við að bæta og breyta eigulegum fötum.

Misbrigði: Sýning unnin af nemendum í fatahönnun á 2. ári við Listaháskóla Íslands í samstarfi við Fatasöfnun Rauða kross Íslands. Ný hönnun úr gömlum fötum.

Sjá nánari dagskrá á síðu Norræna hússins

Hátíðin er skipulögð af Norræna húsinu í samstarfi við eftirfarandi aðila:

• Félag sameinuðu þjóðanna á íslandi
• Kvenfélagasamband Íslands
• Landvernd
• Listaháskóli Íslands
• Repair Café / Tools Library
• Umhverfisstofnun
• Umhverfis- og auðlindaráðuneytið
• Vakandi

NORRÆNA BRÉFIÐ: Frá Finnlandi

Sjálfbær fæða og umhverfisvænn hversdagur
Sirpa Pietikäinen

Loftslagsbreytingar og ágengni gagnvart náttúruauðlindum eykst með ógnarhraða. Það er erfitt fyrir okkur að skilja þegar eitthvað eykst með veldishraða. Tveir verða tíu, tíu verða eitt hundrað, eitt hundrað verður tíu þúsund ... Margfeldisáhrifin leiða til þess að loftslagsbreytingar gerast mun hraðar en ella. Til að stöðva þessa þróun þarf að tvöfalda það sem gert er í dag. Viðfangsefnin verða að vera mörg og stór. Það er nauðsynlegt að koma á umsnúningi (backcasting-method). Mikilvægt er að byrja á að setja markmið um það sem við viljum ná fram og finna svo leiðirnar.

Löggjöf í ESB-ríkjum er nauðsyn til að draga úr loftslagsbreytingum í Evrópu. En það er einnig mikilvægt að einstaklingar og heimili taki málefnið föstum tökum. Við getum annaðhvort flýtt eða hægt á þróuninni með vali okkar í daglegu lífi. Margir einstaklingar eru nú þegar virkir þátttakendur í að bjarga jörðinni en það verður að fá alla hina með, einnig þá sem efast. Stofnanir og félagasamtök gegna mikilvægu hlutverki við að virkja sitt fólk, einfaldlega vegna þess að stór hluti þjóða tilheyrir stofnunum eða samtökum. Það ætti að vera sjálfsagður hlutur að finna hagnýtar lausnir og skipuleggja starfsemina í þágu jarðarinnar. Fyrr á tímum varð til hreyfing fólks sem vildi stuðla að almennri þekkingu meðal þjóða með hjálp ýmissa samtaka. Nú þarf svipaða hreyfingu meðal almennings til að bjarga jörðinni og sporna við loftslagsbreytingum.

Read More

90. aðalfundur Kvenfélagasambands Gullbringu og Kjósarsýslu KSGK var haldinn í Gjánni í Grindavík laugardaginn 2. mars sl. Gestgjafi var Kvenfélag Grindavíkur. Var fundurinn vel sóttur af þeim 10 félögum sem saman mynda KSGK. Félög kynntu fjölbreytt störf sín á sínum svæðum.

Sigríður Finnbjörnsdóttir  og Ása Atladóttir voru gerðar að heiðursfélögum KSGK á aðalfundinum. Eru þær á myndinni hér til hliðar. 

Að loknum fundi var svo móttaka þar sem Bæjarstjóri Grindavíkur Fannar Jónasson, hélt ávarp og bauð konur velkomnar í bæinn og sagði frá sögu Grindavíkur. Arney Ingibjörg Sigurbjörnsdóttir bauð síðan upp á stórkostlegan söng.

Um kvöldið var svo haldin afmælishátíð í Gjánni þar sem félögin buðu upp á fjölbreytt heimatilbúin skemmtiatriði. Forseti KÍ Guðrún Þórðardóttir færði félaginu fallega gestabók og góðar kveðjur frá Kvenfélagasambandi Íslands. Vel heppnað kvöld þar sem um 150 konur sungu fjöldasöng og skemmtu sér við hlátur og dans fram undir miðnætti.

Read More

Sambands sunnlenskra kvenna sendir frá sér eftirfarandi ályktun sem samþykkt var á formannafundi á Selfossi 27. febrúar 2019

Ályktun samþykkt á Formannafundi Sambands Sunnlenskra kvenna 27. Febrúar 2019.
Mikilvægt er að viðhalda sérstöðu Íslands hvað varðar hollustu matvæla og heilbrigði búfjár. Sýklalyfjaónæmar bakteríur eru nú taldar ein stærsta ógn við lýðheilsu um heim allan. Einnig eru víða landlægir dýrasjúkdómar, sem íslenskt búfé og gæludýr hafa ekki ónæmi gegn.
Við teljum að neytendur geti haft mikil áhrif á hvernig þessi mál þróast með því að vanda valið við innkaup matvæla. Með því að velja matvörur, grænmeti, kjöt og mjólkurvörur, sem framleiddar eru innanlands stuðla neytendur að matvælaöryggi og bættri lýðheilsu. Ísland hefur sérstöðu á þessu sviði sem ber að viðhalda.
Varðandi merkingar á innfluttum matvælum ætti að vera ófrávíkjanleg skylda að þær séu greinilega merktar með upprunalandi og vottun á hreinleika, sé slík vottun fyrir hendi.

Read More

Á 58. formannaráðsfundi sem haldin var á Hallveigarstöðum helgina 22. - 23. febrúar sl. voru kosnar tvær nýjar konur inn í stjórn Kvenfélagasambands Íslands.  Þórný Jóhannsdóttir (áður varastjórnarkona KÍ) var kosin varaforseti tvær nýjar varastjórnarkonur voru kosnar þær Björg Baldursdóttir formaður Sambands skagfirskra kvenna og félagskona í Kvenfélagi Hólahrepps og Sólveig Ólafsdóttir formaður Kvenfélags Grindavíkur. 

Vilborgu Eiríksdóttur fráfarandi varaforseta og Kristínu Árnadóttur fráfarandi varastjórnarkonu voru færðar þakkir fyrir störf sín í stjórn Kvenfélagasambands Íslands sl ár. 

Stjórn KÍ er nú þannig skipuð:

Guðrún Þórðardóttir, forseti

Þórný Jóhannsdóttir, varaforseti

Sólrún Guðjónsdóttir, ritari

Bryndís Ásta Birgisdóttir, gjaldkeri

Þuríður Guðmundsdóttir, meðstjórnandi

Björg Baldursdóttir og Sólveig Ólafsdóttir, varastjórnarkonur.