Haustblað Húsfreyjunnar er nú komið út og er komið eða á leið inn um lúgur áskrifenda.

Húsfreyjan er að venju stútfull af einlægum viðtölum og fróðlegu efni.

Dagný Pétursdóttir í Borgarnesi er í forsíðuviðtali. Hún sinnir í dag lýðheilsueflingu af ýmsu tagi og leiðir gusuathafnir í Fólkvanginum Einkunnum norðan við Borgarnes.

Í blaðinu ræðum við einnig við Aðalbjörgu Erlendsdóttur, sem flestir þekkja sem Buddu. Hún sýnir þessa dagana einstaka púða og veggteppi í Borgarbókasafninu í Árbæ. Hún notar litríkt mósaík- og frjálst hekl í sinni sköpun.

Sigríður Sigurðardóttir, frá Stóru-Ökrum í Skagafirði, var safnstjóri Byggðasafns Skagfirðinga í Glaumbæ í 31 ár. Hún er í áhugaverðu viðtali og segir frá sínum störfum og áhugamálum. Sigríður var sæmd íslensku fálkaorðunni fyrir framlag sitt til varðveislu torfbæja og annarra menningarminja.

Dagmar Elín, forseti Kvenfélagasambands Íslands, segir frá ferð sem hún ásamt átta öðrum kvenfélagskonum fór á heimsþing ACWW, sem haldið var í Ottawa í Kanada í vor.

Lára Magnea Jónsdóttir, sem sér um hannyrðaþátt Húsfreyjunnar, býður upp á uppskriftir að fallegri húfu fyrir haustið og klassíska vestfirska vettlinga. Vettlingana kallar hún Laufaviðarvettlinga. Hún er einnig með fallegt útsaumsmynstur í haustlegan púða.

Albert Eiríksson skellti sér í katalónskt matarboð til Sigurlaugar Margrétar útvarpskonu. Sigurlaug deilir með lesendum girnilegum uppskriftum frá Katalóníu.

Read More

Í tilefni sumars er Húsfreyjan stútfull af efni og uppskriftum að mat og handavinnu sem tengjast sumri. Húsfreyjan hvetur okkur til að njóta samveru, matar og íslenska sumarsins.

Á forsíðunni er hún Kristín Le, sem kom til Íslands sem flóttabarn frá Víetnam. Ritstjóri Húsfreyjunnar settist niður með Kristínu. Kristín segir sína sögu og gefur að auki lesendum góð ráð og ljúffengar uppskriftir frá Víetnam, sem myndu sóma sér vel í sumarboðinu. Í dag miðlar hún sinni þekkingu í gegnum námskeið og samfélagsmiðla. Markmið hennar er að kenna fólki að borða án boða og banna.

Ritstjóri ræddi einnig við Hraundísi Guðmundsdóttur, sem er skógfræðingur, ilmolíufræðingur og frumkvöðull á Hvanneyri. Hún fór alla leið til Arizona til að læra að eima íslenskar plöntur til að gera ilmkjarnaolíur. Ilmkjarnaolíur sem eru líkt og skógarbað í flösku. Hraundís fræðir okkur um mismunandi eiginleika ilmkjarnaolíanna sem hún framleiðir.

Read More

Í tilefni 100 ára afmælisins buðu kvenfélagskonur í Kvenfélagi Álftaness, bæjarbúum og öðrum gestum í kaffisamsæti í Lambamýri sem er ný félagsmiðstöð aldraðra á Álftanesi á kosningadaginn 16. maí síðastliðin.

Boðið var upp á kaffi og kökusneið. Fjölmargir mættu, meðal annars bæjarstjóri Garðabæjar, Almar Guðmundsson og sýndu þannig Kvenfélaginu virðingu og þakklæti fyrir það starf sem félagið vinnur í samfélaginu.

Guðrún Brynjólfsdóttir, formaður Kvenfélagsins var þar uppáklædd í þjóðhátíðarkyrtil félagsins. Kyrtillinn var vígður á 17. júní 1989.  En á þeim tíma hét félagið Kvenfélag Bessastaðahrepps, Þegar nafni Bessastaðahrepps var formlega breytt þann 17. júní 2004 í Sveitarfélagið Álftanes var nafni kvenfélagsins einnig breytt og hefur félagið verið kennt við Álftanes upp frá því.  Félagið var stofnað á Bessastöðum 25. apríl 1926.  Fyrsti formaður var Elín Vigfúsdóttir, húsfreyja á Bessastöðum.

Til gamans má geta að í nóvember 1980 gekk forseti Íslands, frú Vigdís Finnbogadóttir, í kvenfélagið. Eliza Reid gekk svo í félagið þegar maður hennar Guðni Th. Jóhannesson var forseti.

Áður höfðu þær haldið upp á afmælið á afmælisdaginn 25. apríl í boði á Bessastöðum, þar sem frú Halla Tómasdóttir, forseti Íslands tók á móti félagskonum.

Hamingjuóskir enn og aftur með 100 árin!

Formaður Kvenfélags Álftaness, Guðrún Brynjólfsdóttir og Dagmar Elín Sigurðardóttir, forseti Kvenfélagasambands Íslands.

Kvenfélagskonur taka á móti bæjarstjóranum, Almari Guðmundssyni.

Heiðursfélagi Kvenfélags Álftaness, Elín Jóhannsdóttir og formaður Guðrún Brynjólfsdóttir.

Tvær nýjar konur voru kosnar í stjórn Kvenfélagasambands Íslands á 73. formannaráðsfundi sem haldin var á Hótel Vesturlandi í Borgarnesi helgina 27. - 28. febrúar 2026.

Hildur Traustadóttir, úr Kvenfélaginu 19. júní á Hvanneyri var kosin ritari KÍ til næstu þriggja ára. Hildur hefur verið félagi í Kvenfélaginu 19. júní frá árinu 1995. Áður var hún í Kvenfélagi Ljósvetninga, en í það gekk hún aðeins 19 ára gömul og var formaður þess um tíma. Hún átti þá einnig sæti í stjórn Sambands þingeyskra kvenna. 

Ragna Guðmundsdóttir var kosin í varastjórn KÍ til næstu þriggja ára. Ragna kemur úr Félagi kvenna í Kópavogi, sem hún hefur verið í frá stofnun þess 2019. Ragna er einnig núverandi formaður Kvenfélagasambands Kópavogs. 

Velkomnar í stjórn kæru konur. 

Magðalena K. Jónsdóttir, gjaldkeri. Dagmar Elín Sigurðardóttir, forseti. Hildur Traustadóttir, nýkjörin ritari. Ragna Guðmundsdóttir, nýkjörin í varastjórn. Eva Björk Harðardóttir, varaforseti og Rósa Marinósdóttir, meðstjórnandi. á myndina vantar Helgu Guðmundsdóttur, varastjórnarkonu sem ekki átti heimangengt á fundinn.