Kristín Linda Jónsdóttir skrifar sinn síðasta leiðara sem ritstjóri Húsfreyjunnar, en hún hefur nú verið ritstjóri Húsfreyjunnar síðan 2004. Hún heldur nú á vit nýrra ævintýra.  Útgáfustjórn Húsfreyjunnar og kvenfélagskonur þakka Kristínu Lindu fyrir afar farsælt starf fyrir Húsfreyjuna sem á dygga lesendur og áskrifendur sem alltaf bíða spenntir eftir blaðinu inn um lúguna.

Í þessu Vorblaði fáum við meðal annars að kynnast Helgu Magneu Steinsson fyrrverandi skólameistari Verkmenntaskóla Austurlands og náms- og starfsráðgjafa. Helga Magnea er líka kvenfélagskona og er nú formaður Kvenfélagsins Nönnu á Neskaupstað og Sambands austfirskra kvenna. Hún segir frá kvenfélagsstarfinu auk þess sem lesendur fá að kynnast henni sjálfri. Í blaðinu eru einnig fréttir frá starfi Kvenfélagasambands Íslands og nýjar stjórnarkonur í stjórn KÍ kynntar.  

Frá Leiðbeiningastöð heimilanna eru góð ráð um hvernig við getum fengið hvíta þvottinn okkar aftur hvítan.

Sigrún Magnúsdóttir fyrrum ráðherra, þjóðfræðingur og kvenfélagskona deilir með lesendum smásögunni sumarkynni um brúðkaup Þuríðar de Grimaldi.

Rósa Emelía Sigurjónsdóttir segir frá framtaki sínu um að skrá og setja inn á facebook dagbók frænku sinnar Helgu Sigurjónsdóttur saumakonu frá Miðhvammi í Þingeyjarsýslu. Margir fylgjast með daglegum færslum Rósu úr dagbókum frænku sinnar. Með ákvörðun sinni um að skrá og opna aðgengi að dagbókum Helgu hefur Rósa opnað dyr inn í heiminn sem Helga lifði og í því felst ómetanleg þekking.

Lesendur fá einnig að kynnast konunni á bakvið tískufyrirtækið Gracelandic, sem meðal annars hefur vakið athygli í tískutímariti Vogue. Grace Achieng segir frá tilurð fyrirtækis síns og ræðir uppvöxt sinn í Kisumu i Kenía. Hún ræðir um sjálfbærni í tískuiðnaðinum sem er hennar leiðarljós og er hönnun  hennar tímalausar og klassískar flíkur sem endast, passa vel saman og eru glæsilegar.

Í Kvenfélagsfréttum deilir Kvenfélagið LÍkn í Vestmannaeyjum með lesendum hvað leyndist í bankahólfi félagsins sem hafði verið lokað í 32 ár. Elstu pappírarnir í hólfinu voru frá 1909 , árið sem félagið var stofnað.

Sirrý Arnarsdóttir segir frá nýjum vef minningar.is þar sem fólki býðst að birta minningargreinar og dánartilkynningar um látna ástvini gjaldfrjálst.

Þær Alda Sigurðardóttir og Þóra Þórarinsdóttir sjá um Hannyrðahornið og gefa handavinnuþyrstum lesendum Húsfreyjunnar næg verkefni í sumar.  Þar má finna uppskriftir að útipeysum fyrir sumarið, heklað Stjörnuteppi og notalegan trefil.

Albert Eiríksson sér um matarþáttinn og gefur hugmyndir að góðgæti sem tilvalið er til að gera sér dagamun í boðum í vor og sumar. Meðal uppskrifta eru Marsipanhorn, Steiktir maísklattar, Döðlukonfekt og Bakaður ostur með fíkjum og hnetum ásamt fleiru.

Krossgátan er að sjálfsögðu á sínum stað.

Þú finnur Húsfreyjuna víða í verslunum Í lausasölu eða getur farið á vefinn okkar husfreyjan.is og gerst áskrifandi.

Kvenfélagasamband Íslands fékk styrk frá Umhverfis-, orku- og loftslagsráðuneytinu vegna áframhald verkefnisins Vitundarvakning um fatasóun.

Fjölbreytt verkefni voru styrkt og er Kvenfélagasamband Íslands einstaklega þakklátt fyrir veittan stuðning. 

Markmið verkefnisins er að: a) fræða almenning um mikilvægi þess að sporna gegn fatasóun og leiðir til þess. b) fræða um umhverfisáhrif og mannréttindaáhrif fataiðnaðarins c) að fá sem flest kvenfélög til að taka þátt í verkefninu. d) að sameina kvenfélög um allt land í átaki gegn fatasóun og annarri sóun

Ráðuneytinu bárust 75 umsóknir um verkefnastyrki. Verkefnin sem hlutu styrki að þessu sinni ná yfir fjölbreytt svið skógræktar, hringrásarhagkerfis, náttúruverndar loftslagsverkefna, landupplýsinga, alþjóðlegs samstarfs og plastmengunar svo dæmi séu tekin.

Meðal þeirra verkefna sem nú hljóta styrki eru kortlagning aðlögunar Íslands að hringrásarhagkerfinu, vitundarvakning um fatasóun,  endurhæfingastöð lundapysja, innleiðing stafrænnar kortlagningar skógræktar, sem og verkefni sem snúa að fuglalífi, víðernum og vindorku. Þá má einnig nefna landbætur, náttúrukort,  ráðstefnur, málþing og fundi um ólík umhverfismál, sem og umhverfisfræðslu í ýmsu formi.

Markhóparnir sem verkefnin ná til eru allt frá eldri borgurum til ungmenna og allt þar á milli.

 „Stjórnvöld leysa fá mál ein og óstudd og frjáls félagasamtök og einstaklingar geta innt af hendi mikilvægt starf í umhverfismálum og náttúruvernd. Bestu hugmyndir kvikna líka oft hjá þeim standa nærri vandanum, hafa skýra yfirsýn og brenna fyrir umbótum til að bæta sitt nærsamfélag,“ segir Guðlaugur Þór Þórðarson, umhverfis-, orku- og loftslagsráðherra. „Þess vegna er líka mikilvægt að geta stutt við verkefni innan þessara geira, sem ella myndu ef til vill ekki ná fram að ganga.“

Sjá nánar á síðu ráðuneytisins

Kvenfélögin rétta fram hjálparhönd

Kvenfélagasamband Íslands (KÍ) hélt sinn 65. formannaráðsfund í Kvennaheimilinu Hallveigarstöðum laugardaginn 26. mars sl. Yfirskrift fundarins var „Af góðum hug koma góð verk“.

Á fundinn koma formenn og fulltrúar þeirra héraðssambanda um land allt sem eiga aðild að KÍ. Formannaráð samþykkti eftirfarandi áskoranir:

• Formannaráð Kvenfélagasambands Íslands skorar á kvenfélagskonur að taka þátt í móttöku flóttafólks sem nú streymir til landsins.  Ljóst er að flóttafólk mun þurfa margskonar aðstoð og eru kvenfélög hvött til að leggja málefninu lið hvert á sínu svæði.

• Formannaráð Kvenfélagasambands Íslands lýsir yfir áhyggjum af fæðuöryggi í heiminum. Hið stríðshrjáða land Úkraína er með stærstu korn- og hveitiframleiðendum í heimi. Við Íslendingar ættum að huga vel að því hvað við getum gert til að bæta fæðuöryggi á Íslandi með meiri ræktun og framleiðslu margvíslegra matvæla.

Nýjar konur voru kosnar í stjórn KÍ en þær eru: Eva Björk Harðardóttir, Kvenfélagi Kirkjubæjarhrepps frá Sambandi Vestur-skaftfellskra kvenna var kosin nýr varaforseti og Helga Guðmundsdóttir,  Kvenfélagi Eiðaþinghár frá Sambandi austfirskra kvenna var kosin í varastjórn.

Read More

þessi dagur 10. mars er er sérstakur hátíðisdagur Norrænu kvennasamtakanna- NKF ( Nordens kvinnoforbund) og eru samtökin  nú 103ja ára.  Kvenfélagasamband Íslands gerðist formlegur aðili að samtökunum 1950. Norrænt sumarþing NKF verður haldið á Íslandi dagana 10-12. júní í sumar.  

Þegar samtökin urðu 100 ára birtist í Húsfreyjunni samantekt úr 100 ára starfi samtakanna. 

Er hún endurbirt hér í tilefni dagsins. 

Read More