Evrópuþing ACWW í Búkarest Rúmeníu

Evrópuþing ACWW verður haldið í Búkarest, Rúmeníu dagana 13. - 17. október 2025.

Nýjustu fréttir! Skráningar eru opnar á: https://acww.org.uk/europe-2025

Hótelið er staðsett aðeins 25 mínútur frá alþjóðaflugvellinum í Búkarest (flugvallarkóði OTP). Í boði er gisting í einstaklings- eða tveggja manna herbergjum.

Gestgjafafélag er Femeia Mileniului III (Konur þriðja árþúsundsins)

Búkarest er staðsett í hjarta Austur-Evrópu og er þekkt sem "París Austursins" og býður gestum upp á ógleymanlega upplifun.

Rúmenía er land sem er fullt af sögu, menningu og þjóðtrú. Er fæðingarstaður hinnar goðsagnakenndu Drácula, en saga hans lifnar við í Bran-kastala í Transylvaníu. Fyrir utan goðsagnirnar er Rúmenía land andstæðna—frá iðandi götum Búkarest til friðsæls andrúmslofts sveitaþorpa og stórkostlegra kastala.

Drög að dagskrá

Mánudaginn 13. október - komudagur og gestgjafafélagið Femeia Mileniului III (Konur þriðja árþúsundsins) taka á móti gestum. Skráning fer fram síðdegis og kvöldverður það kvöld er innifalinn í skráningargjaldi.

Þriðjudagur 14. október - opnunarhátíð, þingfundir og skýrslur frá aðildarfélögum á svæðinu.

Miðvikudagur 15. október -þingfundir halda áfram ásamt fyrirlestrum, umræðum og leiðtogafundi um valdeflingu kvenna.

Fimmtudagur 16. október - boðið upp á skoðunarferð um borgina og þinghöllina; um kvöldið er hátíðarkvöldverður með móttöku.

Föstudaginn 17. október - heimferð

Skráningargjald

Innifalið í skráningargjaldi er gisting, þinggjald, veitingar á fundum, morgunverðir, hádegisverðir og kvöldverðir á þinginu, hátíðarkvöldverður og dagsferð á fimmtudegi.

Tveggja manna herbergi pr. mann - 110.000 kr (659 GBP)

Einstaklings herbergi - 131.000 kr (778 GBP)

Eftir 1. júní 2025 verða skráningargjöld:

Tveggja manna herbergi pr. mann – 117.000 kr (693 GBP)

Einstaklings herbergi– 136.500 kr (811 GBP)

*Öll verð eru samkv. gengi í apríl 2025

Athugið að flug er bókað sérstaklega og er ekki innifalið.

Lokaskráning fer fram 31. júní 2025. Ekki verður tekið við skráningum eftir þann tíma.

Skráningar fara fram á vef ACWW: acww.org.uk/europe-2025

Evrópuþing ACWW eru opin fyrir allar félagskonur innan KÍ.

Vinsamlega látið skrifstofu KÍ vita af öllum skráningum á This email address is being protected from spambots. You need JavaScript enabled to view it., sem veitir einnig allar nánari upplýsingar.

Athugið:

Visitor ferðaskrifstofu sem bókaði fyrir okkur flugið á heimsþingið í Malasíu um árið eru tilbúnar að aðstoða okkur við að bóka flug alla leið. í dag 14. apríl var þetta besta leiðin og verðin.

fljúga með SAS 13. okt. kl. 10:20 millilent í Kaupmannahöfn komið til Búkarest 21:10

Verð 35.785 Isk economy með tösku á mann

Flug 17. okt. frá Búkarest 15:10 millilent í Riga komið til Íslands 23:40

með Air Baltic 39.850 ISK á mann economy með tösku

Kvenfélagasamband Íslands er aðili að Alþjóðasambandi dreifbýliskvenna, ACWW.

Alþjóðasamband dreifbýliskvenna
Associated Country Women of the World - ACWW, Alþjóðasamband dreifbýliskvenna (ACWW) var stofnað árið 1929 (hét áður Alþjóðasamband húsmæðra) KÍ gerðist aðili að ACWW árið 1980.

Svæðisþing Evrópusambands ACWW eru haldin á þriggja ára fresti. Vorið 2014 var svæðisþing í Bergen í Noregi og þar áður í Dublin á Írlandi árið 2011. Evrópuþing var haldið í Tirgu Mures í Rómaníu i september 2017 og í Glasgow 2022, 18 konur mættu frá Íslandi.

Um 9 milljónir kvenna í 70 löndum um allan heim eru meðlimir í ACWW, hafa samtökin staðið að mörgum þörfum og merkum málefnum, eitt af því er stuðningur við konur í s.k. þróunarríkjum.

Greinar

Evrópuþing ACWW í Búkarest Rúmeníu