Landsþing Kvenfélagasambands Íslands (KÍ) var haldið í Hótel Borgarnesi dagana 15. – 17. október sl. Konur í Sambandi borgfirskra kvenna voru gestgjafar. Yfirskrift þingsins var „það sem jörðin gefur”

Dagskrá þingsins var fjölbreytt og nutu konur þess að hittast loks eftir erfiða tíma þar sem nánast allt félagsstarf félaganna hefði legið niðri í heimsfaraldri. Til að gæta sóttvarna var mælst til þess að gestir færu í hraðpróf og tóku konurnar vel í það og gátu því fellt grímuna á fundum og notið samverunnar enn betur en ella.

Á undanförnum árum hefur afrakstur vinnu kvenfélaganna, numið tugi milljóna á ári hverju, sem runnið hefur til menningar- líknarstofnana og til annarra samfélagsverkefna.   Í skýrslu stjórnar KÍ til þingsins kemur fram að kvenfélög innan KÍ hafa gefið  179.053.274 kr. alls til samfélagsins á árunum 2018 – 2020.

Að lokinni þingsetningu í Borgarneskirkju þar sem konur fjölmenntu í bleiku í tilefni Bleika dagsins, tók Kvenfélagið 19. júní á móti þinggestum og heiðursgestum í móttöku í Landbúnaðarháskólanum. Þar flutti forseti Íslands Guðni Th. Jóhannesson ávarp sem verndari Kvenfélagasambands Íslands, með honum var kona hans Eliza Reid forsetafrú.  Forsetinn þakkaði kvenfélagskonum um land allt þeirra drjúgu verk í þágu samfélagsins, störf í heimabyggð og framlög til góðgerðarmála sem muni svo sannarlega um. Ávörp fluttu einnig;  Rektor LHÍ Ragnheiður I. Þórarinsdóttir, sveitarstjóri Hvalfjarðarsveitar Linda Björk Pálsdóttir og sveitarstjóri Borgarbyggðar Þórdís Sif Sigurðardóttir.  Danshópurinn Sporið sýndi síðan við mikla hrifningu þinggesta nokkra fjöruga þjóðdansa.

Á laugardeginum hófst svo þingfundur með venjulegum liðum þar sem mál voru lögð fyrir þingið og Guðrún Þórðardóttir lagði fram skýrslu stjórnar KÍ 2018- 2021.   Hildur Traustadóttir frá Kvenfélaginu 19. júni var 1. þingforseti, Þórný  Jóhannsdóttir varaforseti KÍ var 2. þingforseti og Ingibjörg Daníelsdóttir frá Kvenfélagi Hvítársíðu var 3. þingfroseti.  Fyrir hádegið mætti svo Bjartur Guðmundsson, leikari og frammistöðuþjálfi, sem kveikti svo sannarlega í konum með efni sínu: Óstöðvandi liðsandi.

Framsöguerindi um það sem jörðin gefur samkvæmt yfirskrift þingsins voru flutt eftir hádegi á laugardeginum í umsjón SBK. Linda B. Sverrisdóttur frá Kvenfélagi Borgarness stjórnaði dagskránni.   Erindin voru eftirtalin:

Býrð þú hér? -  Arnheiður Hjörleifsdóttir, sagði frá reynslu sinni og fjölskyldunnar við að taka á mót gestum nær og fjær á Bjarteyjarsand. Hún sagði frá því meðal annars hversu misjafnar upplifanir gesta hennar eru. Sumir fanga kyrrðinni á meðan aðrir sem ekki eru vanir íslensku dreifbýli nánast þola ekki við.  Hespuhúsið Áhugamál sem fór úr böndunum" – Guðrún Bjarnadóttir, hún sagði frá áhugamáli sínu sem hófst með jurtalitum í nokkrum pottum í eldhúsinu í Borgafirðinum, en er nú orðið að stórri jurtalitunarvinnustofu þar sem hún tekur á móti gestum og framleiðir vörur í Ölfusinu. og Við, landið og skógurinn - Laufey Bryndís Hannesdóttir. Laufey sagði frá Skógrækt í Borgarfirðinum og hvernig skógur á undir högg að sækja víða um land. Hún kynnti einnig Birkiskógaverkefni Landgræðslunnar. En þinggestir fengu meðal annars í þingtöskur sínar umslag með birkifræjum sem þær eru hvattar til að gróðursetja í sinni heimabyggð.

Að loknum erindum var svo frumsýning á kjólum fyrir konur sem vilja fallega, íslenska kjóla sem eru framleiddir með hag umhverfisins í huga og af virðingu við fólk og við jörðina.  Það eru feðginin Áskell Þórisson og Laufey Dóra Áskelsdóttir sem vinna nú að því að koma kjólunum á markað, náttúruljósmyndir sem teknar er af Áskeli eru prentaðar á kjólana.  Kjólarnir eru saumaðir á Akranesi og lokavinnsla mynda fer fram á Hvanneyri. Tengist vel við þema þingsins og eitt verkefna KÍ Vitundarvakning um fatasóun.

Hátíðarkvöldverður var svo í umsjón SBK og fór fram í sal Hótel Borgarness. Ása Erlingsdóttir frá Kvenfélagi Stafholtstungna var veislustjóri. Meðal skemmtiatriða voru:  Leikþáttur frá Kvenfélag Hvítársíðu með Heidi Laubert Anderssen og Valdísi Rán Samúelsdóttir,  Þórdís á Hrísum var með skemmtilegan kveðskap. Steinunn Pálsdóttir og Konur úr kvenfélagi Álftárhrepps sungu nokkur lög. Orri trúbador mætti svo með gítarinn og hleypti miklu fjöri í kvennahópinn.  Var svo dregið í happadrættinu á milli dagskráratriða.

Sunnudagsmorguninn hófst svo með Vinnustofu sem bar heitið Framtíðin og við og var í umsjón Ragnheiðar Aradóttur, stjórnenda- og umbreytingamarkþjálfa. Niðurstöður vinnustofunnar verða kynntar á næsta formannaráðsfundi og nýttar við vinnslu stefnu KÍ næstu árin.

Á Sunnudeginum 17. október fóru svo fram kosningar og nýjar konur komu inn í stjórn Kvenfélagasambands Íslands.

Dagmar Elín Sigurðardóttir var kosin forseti KÍ og Magðalena Karlotta Jónsdóttir til gjaldkera. Þuríður Guðmundsdóttir var endurkjörin sem meðstjórnandi. Sjá kynningu á Dagmar og Magðalenu hér neðar á síðunni.

Í Borgarnesi var tímasetning og staðsetning næsta landsþings ákveðin og verður 40. landsþing KÍ haldið helgina 11.- 13. október 2024, gestgjafar verða konur í Sambandi vestfirskra kvenna.  

Landsþingið sendi  frá sér eftirfarandi ályktun:

Landsþing Kvenfélagasambands Íslands, haldið í Borgarnesi 15.-17. október 2021, skorar á heilbrigðisráðherra og viðeigandi stjórnvöld að auka upplýsingar og fræðslu um krabbameinsskimanir. Breytingar á fyrirkomulagi skimana valda óöryggi og geta dregið úr þátttöku í þessu mikilvæga verkefni. Þá hefur skoðunarstöðum fækkað. Nauðsynlegt er að skimun og greining sýna gangi greiðlega fyrir sig þannig að óþarfa bið verði ekki á nauðsynlegri heilbrigðisþjónustu.

Tryggja þarf að þjónusta svo sem brjóstamyndataka, sé veitt sem víðast á landinu. Landsþingið skorar á kvenfélagskonur að taka höndum saman og hvetja konur, sérstaklega ungar konur, til að mæta í skimun og huga að heilsu sinni.

Landsþing KÍ er æðsta vald sambandsins og er haldið á 3ja ára fresti. Á landsþingum KÍ sem haldin eru þriðja hvert ár koma kvenfélagskonur saman til skrafs og ráðagerða um störf sín í kvenfélögunum.

Kvenfélagasamband Íslands (KÍ) var stofnað árið 1930 sem sameiningar og samstarfsvettvangur kvenfélaganna í landinu.  Innan KÍ starfa 142 kvenfélög í 17 héraðs- og svæðasamböndum með um 4500 félaga.

 

móttakan á Hvanneyri gestir á vef

Guðrún Þórðardóttir fráfarandi forseti KÍ afhenti gestum í Móttökunni á Hvanneyri þakklætisvott.

fv. Sveitarstjóri Hvalfjarðarsveit; Linda Björk Pálsdóttir, Sveitarstjóri Borgarbyggð; Þórdís Sif Sigurðardóttir

Elíza Reid forsetafrú, Guðni Th. Jóhannesson forseti Íslands, Rektor LHÍ; Ragnheiður I. Þórarinsdóttir og 

Guðrún Þórðardóttir. 

 

Skálað á hátíðarkvöldverði á vef

Skálað á hátíðarkvöldverði 

kjólasyning á vef

Kvenfélagskonur sýna kjólana sem mæðginin Áskell Þórisson og Laufey Dóra frumsýndu á þinginu. 

 

Bleikar konur í kirkju við þingsetningu

Það var bleikt yfir að líta þegar þingið var sett formlega í Borgarneskirkju á Bleika daginn 15. október. 

landsþingsnefnd SBK á vef

Landsþingsnefnd SBK; fv. Hildur Traustadóttir, Þuríður Guðmundsdóttir, Sólrún Tryggvadóttir, Ágústa Björg Kristjánsdóttir og Linda B. Sverrisdóttir

nýr forseti og gjaldkeri á vef

Nýr gjaldkeri og forseti ásamt mæðrum sínum. fv. Magðalena Karlotta Jónsdóttir nýr gjaldkeri, móðir hennar Björg Bjarnadóttir,

Valdís Ólafsdóttir og svo dóttir hennar nýr forseti KÍ; Dagmar Elín Sigurðardóttir

 

Fleiri myndir frá þinginu verða settar inn á fésbókarsíðu KÍ. 

 

Dagmar mynd vef

Dagmar Elín Sigurðardóttir var kjörin forseti Kvenfélagasambands Íslands til næstu þriggja ára á 39. landsþingi sem haldið var í Borgarnesi helgina 15. – 17. október 2021.

Dagmar er fædd árið 1958 og uppalin í Reykjavík en fluttist seinna í Garðabæinn með manni sínum. Undanfarin ár hefur hún starfað sem aðalbókari, gjaldkeri, séð um innheimtu og útreikning félagsgjalda, starfsmannamál, launaútreikning ofl. Dagmar vann í mörg ár hjá Samtökum iðnaðarins en síðustu ár sem aðalbókari hjá Fastus ehf. Hún er stúdent frá Hagfræðideild Verslunarskóla Íslands og Viðurkenndur bókari frá Háskólanum í Reykjavík.

Frá því Dagmar gekk í Kvenfélag Garðabæjar haustið 1999 hefur hún tekið þátt í mörgum verkefnum og trúnaðarstörfum bæði á vegum Kvenfélags Garðabæjar, Hvítabandsins líknarfélags, sem hún gekk síðar í. Hún hefur sinnt ýmsum störfum og verkefnum fyrir Kvenfélagasamband Gullbringu- og Kjósarsýslu (KSGK) og Kvennasamband Reykjavíkur (KSR) og setið í ýmsum nefndum á vegum Kvenfélagasambands Íslands (KÍ).

Dagmar segir að störf hennar fyrir samböndin hafi sýnt henni mikilvægi þess að vel sé haldið utan um kvenfélög hvar sem þau eru á landinu. „Nú eins og áður er það samtakamáttur kvenna sem gerir okkur kvenfélagskonur að sterku afli til að styðja við bakið á verðugum verkefnum. Þar gegnir KÍ lykilhlutverki enda markmiðið með stofnun þess að kvenfélög landsins ættu sér samstarfsvettvang og málsvara. Í gildum félaga er mikið rætt um kærleik, samvinnu og virðingu og mætti bæta gleðinni þar við því hún er mikilvæg. Þegar við leggjum fram krafta okkur og tíma til verkefna þá uppskerum við gleðina við að geta veitt aðstoð.“

„Það hefur verið ákaflega ánægjulegt að hitta og kynnast konum alls staðar að af landinu og jafnvel út fyrir landssteinana enda má segja að KÍ sé með stærsta og öflugusta tengslanet kvenna á Íslandi. Allt félagsstarf eflir og styrkir og er ég þakklát fyrir það traust sem mér hefur verið sýnt.“

Dagmar hefur tekið að sér fjölmörg trúnaðarstörf í þágu félaganna sem hún á aðild að.

Þau eru eftirfarandi:

Hússtjórn Hallveigarstaða, formaður 2021 -

Hússtjórn Hallveigarstaða, ritari 2018 - 2021

Hvítabandið líknarfélag, formaður 2012 – 2018

Kvennasamband Reykjavíkur, formaður 2016 – 2020

Hússtjórnarskóli Reykjavíkur, stjórnarmaður 2016 –

Kvenfélag Garðabæjar, formaður 2005 – 2009

Kvenfélag Garðabæjar, varastjórn 2003 – 2005

Kvenfélagasambands Íslands, skoðunarmaður reikninga 2006 – 2012

Nefnd um málefni Kvenfélagasambands Íslands, formaður 2005 – 2006

Félag viðurkenndra bókara, Laga- samskipta- og aganefnd 2012 – 2016

Magðalena Karlotta Jónsdóttir

Magðalena Karlotta Jónsdóttir var kjörin gjaldkeri Kvenfélagasambands Íslands (KÍ) til þriggja ár á 39. landsþingi KÍ haldið í Borgarnesi helgina 15. – 17. október sl.

Magðalena er fædd 1.ágúst 1965 og alin upp á Sölvabakka í Húnavatnssýslu, dóttir hjónanna Bjargar Bjarnadóttur og Jóns Árna Jónssonar. Hún er stúdent frá Menntaskólanum á Akureyri og fór eftir stúdentspróf í Bændaskólann á Hvanneyri þar sem til stóð að taka við búskapnum af foreldrum sínum. Á  Hvanneyri heillaði hana ungur maður og flutti hún með honum austur undir Eyjafjöll og hefur búið þar síðan 1988 í Drangshlíðardal sem bóndi og húsmóðir.  Meðfram barnauppeldi og sveitastörfum hefur Magðalena notið sín í félagsstörfum og tekið þátt í þeim félagsskap í nærumhverfinu sem í boði hefur verið. Magðalena gekk í kvenfélagið Fjallkonuna árið 1993 og árið 1994 varð hún formaður þar og verið formaður þar um 15 ára skeið með hléum. Hún var gjaldkeri Sambands sunnlenskra kvenna á árunum 2003-2012. Hefur setið í skýrslunefnd SSK síðustu ár og verið skoðunarmaður KÍ síðustu 6 ár.

Aðspurð hversvegna hún hefði tekið ákvörðun um að bjóða sig fram í stjórn KÍ sagði Magðalena, eða Lena eins og hún er kölluð; „Ég hef gaman af þeim félagsskap sem kvenfélögin veita. Ég er stolt af þeim verkefnum sem kvenfélögin um land allt sinna og því merkilega hlutverki sem þau eiga í menningu, sögu, og uppbyggingu samfélagsins. Svo má ekki gleyma þeim verðmætum sem felast í því persónulega að kynnast nýjum konum um land allt og stækka tengslanetið.

 

 

Haustblað Húsfreyjunnar er komið út . 
Að venju er blaðið stútfullt af greinum, viðtölum, fræðslu og góðu efni.
Á forsíðunni er Dr. Ragnheiður I. Þórarinsdóttir rektor Landbúnaðaháskóla Íslands, en hún er jafnframt í aðalviðtali blaðsins. Ragnheiður segir frá sjálfri sér, skólanum og ræðir landbúnaðinn.
Nýtt í Húsfreyjunni er Póstkort og þar er skyggnst inn í Blómasetrið – Kaffi Kyrrð sem er fjölskyldurekið fyrirtæki í Borgarnesi. Sagt er frá bókinni Konur sem kjósa sem kom út fyrir nokkru, en bókin var gefin út í tilefni 100 ára afmælis kosningarréttarins og fjallar um íslenska kvenkjósendur.
 
Lesendur fá nú nýja smásögu að lesa, en það er smásagan Hugrenningar og hófatak eftir Þórdísi Sigurbjörnsdóttur en hún hlaut önnur verðlaun í Smásögusamkeppni Húsfreyjunnar fyrr á þessu ári.
Á síðum Leiðbeiningastöðvar heimilanna er afturnýtingu og endurnýtingu gerð skil með grein um verk Guðrúnar Borghildar Ingvarsdóttur, en hún afturnýtir það sem aðrir eru búnir að henda.
 
Nýjar konur sjá nú um Hannyrðahornið. Það eru þær Alda Sigurðardóttir og Þóra Þórarinsdóttir. Þær gefa lesendum uppskriftir að skemmtilegum handavinnuverkefnum, m.a. heklað langsjal, fallega barnapeysu og fallega kvenpeysu. Húsfreyjan býður þær velkomnar í Hannyrðahornið og það verður gaman að fylgjast með hvað þær munu bjóða lesendum upp á í næstu blöðum.
Albert Eiríksson sem flestir þekkja hefur aftur tekið að sér að sjá um matarþátt Húsfreyjunnar og hann býður lesendum upp á uppskriftir sem henta haustinu, enda heitir matarþátturinn hans að þessu sinni Matartöfrar haustsins. Þar má finna m.a. uppskrift að Smalaböku, ávaxtafylltum hjörtum, „Coq au vin“ eða hana í víni og fleira gómsætt.
Unnur Pálmarsdóttir gefur lesendum sjö ráð til að koma sé af stað í heilbrigðan lífstíl í haust, auk þess að gefa uppskriftir að heilsusamlegum detoxdrykkjum. Guðrún Hannele gefur uppskrift af skemmtilegum íslenskum vettlingum sem lesendur geta spreytt sig á í haust.
Þetta og margt fleira í haustblaði Húsfreyjunnar. Þú getur gerst áskrifandi á husfreyjan.is eða nálgast blaðið í lausasölu á næsta sölustað

Rakel Kvennasögusafn afhending 2021webMánudaginn 30. ágúst sl. afhenti Kvenfélagasamband Íslands gögn sem höfðu verið í geymslu KÍ á Hallveigarstöðum frá því 2006. En þá hafði Kristín Guðmundsdóttir fyrrum starfsmaður KÍ unnið að því að skrásetja og pakka mikið magn af  skjölum KÍ í þó nokkurn tíma. Elstu skjölin í safninu eru frá landsþingi KÍ sem haldið var árið 1945. Þó gæti vel leynst þar eldri skjöl því ekki er dagsetning á öllum kössunum.  Nú geta áhugasamir nálgast skjölin á aðgengilegan hátt á Kvennasögusafninu.

Á myndinn sem fylgir er Rakel Adolphsdóttir fagstjóri Kvennasögusafnsins ásamt hluta þeirra skjala sem afhent voru sl. mánudag. 

Kvenfélagasamband Íslands

Hallveigarstöðum  - Túngötu 14  - 101 Reykjavík
552 7430 
kvenfelag@kvenfelag.is

© 2017 - 2021 Kvenfélagasamband Íslands