Gjöf til allra kvenna á Íslandi sem safnað var fyrir í tilefni 90 ára afmælis Kvenfélagasambands Íslands hefur nú verið tekin í notkun á öllum fæðingarstöðum. Formleg afhending hefur því nú farið fram á Akranesi, Ísafirði, Reykjanesi, Akureyri, Vestmannaeyjum og Selfossi. Neskaupstaður hefur tekið gjöfina í notkun og verður afhent formlega síðar.
Alls var safnað um 30 milljónum og kom stærsti hluti söfnunarfésins beint frá kvenfélögunum, auk þess sem bæði fyrirtæki og einstaklingar lögðu sitt af mörkum.
Um er að ræða hugbúnað og tæknilausnina Milou, sem er rafrænt kerfi fyrir skráningu og vistun fósturhjartsláttarrita. Milou nýtist til að fylgjast með hjartslætti fósturs og er mikið öryggi fyrir þungaðar konur á meðgöngu og í fæðingu.
Einn af stóru kostunum við hugbúnaðinn er, að þessi tækni getur komið í veg fyrir að senda þurfi konur jafnvel um langan veg til til frekari skoðunar.
Fósturhjartsláttarritin er hægt að sjá í rauntíma og fá þar með eftir öruggum leiðum faglegt álit frá hærra þjónustustigi, eins og t.d.hjá Kvennadeild LSH eða á Akureyri.
Sérfræðingar geta séð í rauntíma hvað er að gerast og gefið álit. Þetta eykur öryggi til muna auk þess sem þetta getur létt konum og fjölskyldum heilmikil ferðalög á viðkvæmum tímum. Mikið öryggisatriði er svo að gögnin vistast rafrænt í sjúkraskrá móður. Ritin eru flokkuð með kerfisbundnum hætti og allar athugasemdir og kvittanir koma inn á ritið með rafrænum hætti.
Björk Steindórsdóttir, yfirljósmóðir á HSU, hefur verið tengiliður við alla fæðingarstaðina á landinu og unnið með Kvenfélagasambandi Íslands, þær Dagmar Elín , forseti KÍ og Elinborg úr afmælisnefnd hafa unnið ötullega ásamt Björk að því að keyra áfram innleiðinguna á tækninni. Þær hafa verið við afhendingarnar þar sem því hefur verið við komið, auk fulltrúa úr stjórn KI Það hafa svo verið kvenfélagskonur af svæðinu sem hafa afhent gjöfina formlega á hverjum stað.
Við afhendinguna á Selfossi, sagði Björk: "Við erum mjög þakklát Kvenfélagasambandinu og kvenfélögunum um allt land að hafa keyrt þetta verkefni áfram. Það voru ýmsar hindranir á leiðinni, vegna persónuverndar, tæknivandamála og kórónuveirufaraldursins. Það er svo magnað hvað þessar konur sem stóðu að þessu eru sterkar. Þær voru einhuga að klára þetta verkefni og gefast ekki upp".
Við afhendinguna á Selfossi 17. nóvember síðastliðinn þakkaði Dagmar Elín Sigurðardóttir, forseti KÍ, Björk kærlega fyrir hennar góða starf og færði henni þakklætisvott.
Í afmælisnefndini sem stóð að söfnuninni 2020 voru;
Eva Michelsen, formaður afmælisnefndar, Kvenfélagasamband Kópavogs
Elinborg Sigurðardottir, ritari afmælisnefndar, Samband sunnlenskra kvenna SSK
Linda Sverrisdóttir, afmælisnefnd, Samband borgfirskra kvenna
Ágústa Magnúsdóttir, afmælisnefnd, Kvenfélagasamband Gullbringu- og Kjós KSGK
Fulltrúar stjórnar KÍ
Þórný Jóhannsdóttir, gjaldkeri afmælisnefndar varaforseti Kvenfélagasambands Íslands
Sólveig Ólafsdóttir, varastjórn Kvenfélagasambands Íslands
Guðrún Þórðardóttir, forseti Kvenfélagasambands Íslands
og Jenný Jóakimsdóttir, starfsmaður KÍ.
Linda, Elinborg, Sólveig, Þórný, Guðrún og Jenný úr afmælisnefnd á landsþingi 2024.
Sjá nánari fréttir:
Frétt frá afhendingu í Vestmannaeyjum.
Frétt frá afhendingunni á Selfossi
Nánar um söfnunina og tæknina á síðunni Gjöf til allra kvenna.