Kvenfélagasamband Íslands hefur fengið áframhaldandi styrk frá Umhverfis- og auðlindaráðuneyti fyrir verkefnið Vitundarvakning um fatasóun. Með verkefninu mun KÍ halda áfram að vekja kvenfélagskonur og almenning til að taka þátt í að minnka fatasóun. Áfram verður því vakin athygli á umhverfisáhrifum fatasóunar með fyrirlestrum, viðburðum og greinum í Húsfreyjunni og á vef Leiðbeiningastöðvar heimilanna. Næsti Umhverfisdagur verður á Hallveigarstöðum þann 23. mars nk. og eins og í fyrra verður þar fræðsla, fataskiptimarkaður, boðið upp á fataviðgerðir og fleira tengt sóun.  Takið daginn frá! Meðfylgjandi mynd er frá Umhverfisdeginum í nóvember sl.

Guðrún Snæbjörnsdóttir og Margrét Lilja Magnúsdóttir frá Kvenfélagi Álftaness við saumavélarnar að aðstoða við fataviðgerðir. 

1. febrúar, á Degi kvenfélagskonunnar var Félag kvenna í Kópavogi formlega stofnað.
Á stofnfundinn sem haldinn var í sal Siglingaklúbbsins Ými við Naustavör mættu hátt í 80 konur og var fullt út úr dyrum. Vaskar konur í Kópavogi höfðu undirbúið stofnunina í þó nokkurn tíma og var mikil gleði á fundinum, þar sem lög félagsins og nafn félagsins voru samþykkt og kosin stjórn. Guðrún Þórðardóttir forseti Kvenfélagasambandsins færði félaginu gestabók frá KÍ og færði hinu nýja félagi góðar kveðjur frá stjórn KÍ. Með stofnun félagsins verður haldið áfram sögu kvenfélags í Kópavogi. En á síðasta ári var Kvenfélagi Kópavogs því miður slitið en það hafði starfað í 70 ár.  Með stofnun þessa nýja félags mun kvenfélagastarf í Kópavogi halda áfram. Það er mikill eldmóður í konum í nýja félaginu og verðrur gaman að fylgjast með starfi þeirra. 

Þessar konur hlutu kosningu í stjórn Félags kvenna í Kópavogi.. 

Bryndís Friðgeirsdóttir, formaður
Eva Michelsen, varaformaður
Brynhildur Jónsdóttir, fjármálafulltrúi
Kristín Björk Viðarsdóttir, upplýsingafulltrúi
Harpa B. Hjálmtýsdóttir, viðburðastjóri
Ásta Hjálmtýsdóttir, varamaður
Þórhildur Guðsteinsdóttir, varamaður

Á myndinni sem fylgir eru konur í undribúningsnefnd stofnfundar ásamt nýkjörinni stjórn Félags kvenna í Kópavogi ásamt Guðrúnu Þórðardóttur forseta KÍ og Vilborgu Eiríksdóttur varaforseta KÍ.

Þann 18. janúar sl. fór hópur kvenfélagskvenna úr Grímsnesi í heimsókn á HSU Selfossi.  Tilefni heimsóknarinnar var að færa HSU formlega að gjöf rúmhjól, sem félagið færði stofnuninni í lok síðasta árs.  Heilbrigðisstofnun Suðurlands hefur ekki haft áður til umráða slíkt hjálpartæki. En þar er það notað af einstaklingum sem koma í blóðskilun.

Kvenfélag Grímsneshrepps er eitt af elstu kvenfélögum landsins og fagnar á þessu ári, þann 24. apríl 100 ára afmæli.  Í tilefni afmælisins gefur kvenfélagið út sögu félagsins þessi 100 ár.

Sjá nánar á heimasíðu HSU

Kvenfélagasamband Íslands sendir kvenfélagskonum, fjölskyldum þeirra, velunnurum, samstarfsaðilum og landsmönnum öllum hugheilar jóla og nýárskveðjur.

Með þökk fyrir ánægjulegar stundir á landsþinginu á Húsavík og árinu öllu.

Sérstakar þakkir frá félagskonur í Kvenfélagasambandi Suður- Þings fyrir dásamlegt landsþing á Húsavík og frábært samstarf við undirbúning.

Skrifstofa Kvenfélagasambandsins og Húsfreyjunnar verður lokuð frá 21. des - 3. janúar 2019

UMHVERFISDAGUR – VITUNDARVAKNING UM FATASÓUN

Laugardaginn 17. nóvember næstkomandi mun Kvenfélagasamband Íslands (KÍ)  bjóða alla velkomna á Umhverfisdag í Kvennaheimilinu Hallveigarstöðum frá 11 – 16

Tilefnið er verkefni Kvenfélagasambandsins og Leiðbeiningastöðvar heimilanna „Vitundarvakning um fatasóun“ sem KÍ fékk styrk fyrir frá Umhverfisráðuneytinu á þessu ári.

• Kvenfélagskonur munu setja upp saumaverkstæði - og aðstoða gesti og gangandi við að gera við fötin sín. 
  • Einnig verður hægt að komast í saumavél og gera við sjálf/ur
• Fataskiptimarkaður – þar sem gestum er boðið að mæta með vel með farnar flíkur sem ekki eru í notkun og fá aðrar í staðinn.
• Flóamarkaður - viltu losa þig við gamalt og styrkja gott málefni í leiðinni? 
• Sýning á flíkum sem hafa verið endurunnar, frá nemendum á fataiðnbraut Tækniskólans. Sýning og sala á fleiri sniðugu sem er endurunnið og umhverfisvænt.
• Kynningar á umhverfisvænum vörum.

Allir velkomnir 
Kaffi og vöfflur að hætti kvenfélagskvenna

Read More