Sambands sunnlenskra kvenna sendir frá sér eftirfarandi ályktun sem samþykkt var á formannafundi á Selfossi 27. febrúar 2019

Ályktun samþykkt á Formannafundi Sambands Sunnlenskra kvenna 27. Febrúar 2019.
Mikilvægt er að viðhalda sérstöðu Íslands hvað varðar hollustu matvæla og heilbrigði búfjár. Sýklalyfjaónæmar bakteríur eru nú taldar ein stærsta ógn við lýðheilsu um heim allan. Einnig eru víða landlægir dýrasjúkdómar, sem íslenskt búfé og gæludýr hafa ekki ónæmi gegn.
Við teljum að neytendur geti haft mikil áhrif á hvernig þessi mál þróast með því að vanda valið við innkaup matvæla. Með því að velja matvörur, grænmeti, kjöt og mjólkurvörur, sem framleiddar eru innanlands stuðla neytendur að matvælaöryggi og bættri lýðheilsu. Ísland hefur sérstöðu á þessu sviði sem ber að viðhalda.
Varðandi merkingar á innfluttum matvælum ætti að vera ófrávíkjanleg skylda að þær séu greinilega merktar með upprunalandi og vottun á hreinleika, sé slík vottun fyrir hendi.

Read More

Á 58. formannaráðsfundi sem haldin var á Hallveigarstöðum helgina 22. - 23. febrúar sl. voru kosnar tvær nýjar konur inn í stjórn Kvenfélagasambands Íslands.  Þórný Jóhannsdóttir (áður varastjórnarkona KÍ) var kosin varaforseti tvær nýjar varastjórnarkonur voru kosnar þær Björg Baldursdóttir formaður Sambands skagfirskra kvenna og félagskona í Kvenfélagi Hólahrepps og Sólveig Ólafsdóttir formaður Kvenfélags Grindavíkur. 

Vilborgu Eiríksdóttur fráfarandi varaforseta og Kristínu Árnadóttur fráfarandi varastjórnarkonu voru færðar þakkir fyrir störf sín í stjórn Kvenfélagasambands Íslands sl ár. 

Stjórn KÍ er nú þannig skipuð:

Guðrún Þórðardóttir, forseti

Þórný Jóhannsdóttir, varaforseti

Sólrún Guðjónsdóttir, ritari

Bryndís Ásta Birgisdóttir, gjaldkeri

Þuríður Guðmundsdóttir, meðstjórnandi

Björg Baldursdóttir og Sólveig Ólafsdóttir, varastjórnarkonur. 

Fyrsta tölublað Húsfreyjunnar á 70 ára afmælisárinu er komin út. 
Í þessu fyrsta tölublaði afmælisársins er fjölbreytt efni að vanda. Fjallað er um sögu Húsfreyjunnar í 70 ár. Sólveig Ólafsdóttir formaður kvenfélagsins i Grindavík er í forsíðuviðtali og segir frá sjálfri sér og þeim fjölbreyttu verkefnum sem kvenfélagið í Grindavík starfar að. Albert Eiríksson hefur umsjón með matarþættinum og fjallar um samverustundir og gefur uppskriftir að góðu á borðið þegar boðið er til samveru. Helga Jóna Þórunnardóttir, kennari í hinum þekkta Skals hönnunar- og handverkskóla í Danmörku sér um handavinnuþáttinn og gefur meðal annars uppskrift að tösku sem prjóna má í sundi eða heita pottinum þríhyrnu úr íslenskri ull og silki og uppskrift af fallegri peysu. Áfram er rætt um verkefni Kvenfélagasambandsins "Vitundarvakning um fatasóun". Að venju er Norræna bréfið birt í fyrsta tölublaði ársins,en það er Sirpa Pietikäinen sem er höfundur bréfsins í ár. Sirpa er finnskur fulltrúi Evrópuþingsins. Ljóðaveislan heldur áfram og ný ljóðasamkeppni kynnt til sögunnar. 

Read More

Kvenfélagasamband Íslands hefur fengið áframhaldandi styrk frá Umhverfis- og auðlindaráðuneyti fyrir verkefnið Vitundarvakning um fatasóun. Með verkefninu mun KÍ halda áfram að vekja kvenfélagskonur og almenning til að taka þátt í að minnka fatasóun. Áfram verður því vakin athygli á umhverfisáhrifum fatasóunar með fyrirlestrum, viðburðum og greinum í Húsfreyjunni og á vef Leiðbeiningastöðvar heimilanna. Næsti Umhverfisdagur verður á Hallveigarstöðum þann 23. mars nk. og eins og í fyrra verður þar fræðsla, fataskiptimarkaður, boðið upp á fataviðgerðir og fleira tengt sóun.  Takið daginn frá! Meðfylgjandi mynd er frá Umhverfisdeginum í nóvember sl.

Guðrún Snæbjörnsdóttir og Margrét Lilja Magnúsdóttir frá Kvenfélagi Álftaness við saumavélarnar að aðstoða við fataviðgerðir. 

1. febrúar, á Degi kvenfélagskonunnar var Félag kvenna í Kópavogi formlega stofnað.
Á stofnfundinn sem haldinn var í sal Siglingaklúbbsins Ými við Naustavör mættu hátt í 80 konur og var fullt út úr dyrum. Vaskar konur í Kópavogi höfðu undirbúið stofnunina í þó nokkurn tíma og var mikil gleði á fundinum, þar sem lög félagsins og nafn félagsins voru samþykkt og kosin stjórn. Guðrún Þórðardóttir forseti Kvenfélagasambandsins færði félaginu gestabók frá KÍ og færði hinu nýja félagi góðar kveðjur frá stjórn KÍ. Með stofnun félagsins verður haldið áfram sögu kvenfélags í Kópavogi. En á síðasta ári var Kvenfélagi Kópavogs því miður slitið en það hafði starfað í 70 ár.  Með stofnun þessa nýja félags mun kvenfélagastarf í Kópavogi halda áfram. Það er mikill eldmóður í konum í nýja félaginu og verðrur gaman að fylgjast með starfi þeirra. 

Þessar konur hlutu kosningu í stjórn Félags kvenna í Kópavogi.. 

Bryndís Friðgeirsdóttir, formaður
Eva Michelsen, varaformaður
Brynhildur Jónsdóttir, fjármálafulltrúi
Kristín Björk Viðarsdóttir, upplýsingafulltrúi
Harpa B. Hjálmtýsdóttir, viðburðastjóri
Ásta Hjálmtýsdóttir, varamaður
Þórhildur Guðsteinsdóttir, varamaður

Á myndinni sem fylgir eru konur í undribúningsnefnd stofnfundar ásamt nýkjörinni stjórn Félags kvenna í Kópavogi ásamt Guðrúnu Þórðardóttur forseta KÍ og Vilborgu Eiríksdóttur varaforseta KÍ.